За тэгэхээр энэ машиныг анх аваад удаагүй байхдаа доорх ривюг бичиж байсан юм. Харин түүнээс хойш 3 жил болж байна. Тэгэхээр энэ машины талаарх анхны үнэлэлттэй 3 жилийн дараах дүгнэлтийг харьцуулж бичье ээ.
TOYOTA HILUX SURF SSR-X 4x4: -ийн талаар өөрийн дүгнэлтээ та бүхэнтэй хуваалцъя: Энэ машиныг Ланд80, Прадо95-тай зарим талаар нь харьцуулж бичье.
За тэгэхээр Toyota Hilux гэдэг машинийг хүмүүс сайн муу янз бүрээр л хэлэлцдэг. Түрүү үеийн хуучны энэ
загварт нь хүмүүс ам муутай байдаг байсан. Амархан дуу шуу ордог, дороо л навсайчихдаг гээд. Тийм болохоор хүмүүс зүгээр л нэг амнаас ам дамжсан яриагаар Hilux муу гэж дүгнээд байх шиг байна.
Энэ машины сүүлд гарсан /Hilux 185/
энэ загвар нь харин их дажгүй бөх, гоё болсон.
-Жин: 1740кг.
Хөнгөн байна гэдэг нь бензин бага идэх үндэс.
-Үндсэн гол эд анги: Энэ машин нь Прадо95-тай үндсэндээ ижил машин. Түүний рам, ***, мотор, хроп, явах эд анги гээд бүхий л зүйлс нь ижил. Энэ нь Ланд круизер Прадо серийн ижил шасситай гэсэн үг юм. Тэгэхээр энэ машины явах эд анги тал дээр бүрэн итгэж болно. Ландтай ижил том дугуйтай тул түүнтэй яг л ижилхэн хэмжээний газраас өндөр, иймд тулна гэсэн ойлголт байхгүй нь сайхан.
-Хурд: 2700сс буюу их жижиг мотортой гэхэд өөртөө хангалттай хурдтай.
Милл нь 185км/ц орчимд очоод цааш явахаа больдог. Жижиг мотортой тул огцом хурд тийм сайнгүй ч хурдлаад давхихлаараа юун Ланд80 вэ, хурдаар 80-ийг бараадуулахчгүй. Шулуун замд бол маш сайхан гүйлттэй тэрэг. Манайханы хэлдгээр хөл хөнгөн тэрэг.
-Тэнцвэр: Прадог бодвол нарийн кабинтай, адилхан өргөнтэй нэг тэнхлэг дээр суурилсан, кабины орой нь намхан тул унаад явахад их түшигтэй, тэнцвэр их сайтай. Унаж үзээгүй байхдаа энэ машиныг хараад их нарийхан кабинтай юм байна, тэнцвэр жаахан муутай годгоноод, дэндэгнээд байх болов уу? гэж бодоод энэ машиныг тоож ч харахгүй хажуугаар нь алгасч гараад явчихдаг байснаа энэ дашрамд хэлмээр байна. Гэтэл унаад үзтэл, бүүр 130 км/ц хурдтай давхиж үзтэл миний бодсон бодол, машины тэнцвэртэй байдал 2 газар тэнгэр шиг зөрсөн дөө. Миний хувийн дүгнэлтээр Ланд80-аас илүү тогтвортой санагдсан.
-Шатахуун зарцуулалт: Шулуунд засмал дээр 10л,
/ачаа багатай хурд хасаад байх юмгүй бол 9л ч идэх тохиолдол бий/ шороон замд 11-12л, төвд 16л-18л орчим зун,
өвөл бол 20+.
-Салон: Салоны багтаамжийн хувьд Ланд80-аас мэдээж нарийхан, гэхдээ уртын хувьд ижил. Харьцангуй урт машин, ялангуяа арын "Хонины хонхор" нь нилээд зайтай. Арын 2 суудлаа урагш хэвтүүлсэн байхад хир баргийн ачааг багтаана л гэж ярина.
Салон нь нарийн талдаа тул арын суудалд 5 хүн суугаад чихээд байх нь дэмий л болов уу.
/Хэдий нарийхан ч зарим зайлшгүй тохиолдолд арын суудалд 5-6 хүн багтдаг/
-Бөх бат: Энэ тал дээр нилээд удаан хугацааны туршид эдлэж байж хариу хэлэх бизээ. Аваад 7 сар болох хугацаанд их л тэнэлээ, үнэндээ өөлөх ямар ч асуудал гарсангүй. Нилээд бахим болгож хийсэн эд ангиудыг хараад сэтгэгдэл өндөр л сууна. Жишээ нь: Энэ машины урд, арын гээд бүх гуперүүд нь бүгд эргэн тойрондоо цул хар төмөр байдаг. Миний мэдэхийн, 2000 оноос хойш үйлдвэрлэгдсэн ямар ч жиипнүүдэд ийм гупер огт байхгүй байхаа. Ланд100, 105, 200 гэх мэт.
За 3 жил гэдэг машины чанарыг таних хангалттай хугацаа. Энэ тал дээр 5+ гэдэг дүн тавьлаа. Ямар ч асуудал гарсангүй.
-Туулах чадвар: Бартаанд хаана ч өөрийгөө хангалттай аваад явчих чадвартай машин. Өвлийн их цастайд зарим тиохиолдолд Ланд80-аас ч илүү явдаг гэж хэлвэл магадгүй зарим хүмүүс итгэхгүй ч байж мэдэх юм. Ямар ч байсан дутахгүй. Барьцаж л явдаг дунд гарын цөөхөн жипний нэг дээ. Цас шавар элс 3-т үнэндээ тоглоно доо. Өөдрүү мацахдаа ч сайхан явдаг юм билээ.
-Бусад онцлог давуу талууд: Энэ машиныг анх худалдан авах үнэ нь харьцангуй хямд, тэгсэн мөртлөө түүний техник үзүүлэлтүүд нь бусад үнэтэй жипнүүдэд байдаг гол гол үзүүлэлтүүдийг бүгдийг өөртөө шингээж чадсан.
Запас дугуйгаа тусгай үүрэгчээр үүрдэг тул хаалгаа унжуулж дуу шуу оруулна гэсэн ойлголт байхгүй. Прадо95 шиг ардаа зүүсэн банкгүй тул банкаараа газар шүргээд байна гэсэн ойлголт байхгүй. Араас нь харахад Стандарт өндөрлөгөөтэй 80-аас өндөр харагддаг.
Мөн бас нэг давуу тал нь хамгийн арын шил нь доош буудаг нь их таалагддаг.
-Даац: Даацын тал дээр шороон замд Ланд80-аас муу санагдсан. Гэхдээ учиргүй хүнд юм чихээд, норм хэтрүүлээд, харайлгаж үсэргээд "нисгэж эвдээд" байхгүй бол мэдээж хаа ч хүргэж дөнгөнө.
За даацын тал дээр мэдээж Ланд80-тай юу зүйрлэх вэ, муу. Хэрэв эзэн их ачаа ачдаг бол пүршээ солиод асуудлыг шийдэж болох л юм, гэхдээ их гарын жип биш гэдгийг санах хэрэгтэй. Хэрвээ ачаа их ачих хэрэгцээтэй бол түүний пикап хувилбар оновчтой.
-Мотор: Мотор их сайтай машин санагдсан. Байнга ус гоожоод л давхиад байна. Яндангаа зэврүүлээд цоолчих вий гэмээр.
+
- Хальтиргаа гулгаа: Энэ тал дээр янзтай сайхан. Өвлийн гулгаан дээр мостонд нь залгах үе бараг гардаггүй юмаа. Өөрийнхөө Хайлаксыг унаж байгаад Ланд100 унаад гадуур явтал Ланд100 чинь харин маш их гулгаж хальтирж давхисан балай машин санагдсан.
Нэг ч гэсэн хүнд хэрэг болж юуны магад гэж өөрийнхөө дүгнэлтийг та бүхэнтэйгээ хуваалцлаа.
Хүмүүст хэрэгтэй үнэн зөв мэдээлэл түгээх нь энэ сайтын үндсэн зорилгуудын нэг биз ээ. Тэр үйлсэд бага ч гэсэн хувь нэмэр оруулсандаа баяртай байна.
